Betanzos adxudica unha nova fase do plan de iluminación pública por 1,1 millóns de euros
O Concello de Betanzos vén de adxudicar unha nova fase do seu programa de mellora do alumeado público, cun investimento de 1,1 millóns de euros. A actuación prevé a instalación de 461 novos puntos de luz dotados con tecnoloxía LED e sistemas de control intelixente en diferentes barrios, parroquias e estradas do municipio.
Trátase dunha nova intervención enmarcada no programa de proxectos singulares de entidades locais que impulsa o Instituto para a Diversificación e Aforro da Enerxía (IDAE), cofinanciado con fondos FEDER, orientado a reducir o consumo eléctrico e as emisións e a favorecer o tránsito cara a unha economía baixa en carbono.
Segundo explicou a alcaldesa, María Barral Varela, o obxectivo é seguir modernizando as instalacións eléctricas municipais, substituíndo luminarias tradicionais por outras de maior rendemento lumínico e menor potencia instalada, ao tempo que se diminúe de maneira notable a contaminación lumínica. Os cadros de mando disporán de sistemas de telexestión e de regulación do fluxo lumínico, o que permitirá adaptar a intensidade da luz a cada franxa horaria e ao uso de cada zona, optimizando a factura eléctrica e a calidade da iluminación.
No ámbito industrial e rural, a nova fase inclúe a renovación integral do alumeado no polígono de Piadela, na contorna de Viuxe, así como nas zonas de Montellos, Roibeira, Bravio, Tabacos, Acea e San Xiao. Tamén se actuará en varios treitos da estrada que une Betanzos con Coirós e na vía en dirección a Ferrol, mellorando a visibilidade e a seguranza viaria nestes itinerarios.
Na zona urbana están previstas intervencións na rúa Concepción Arenal, en rúas do casco histórico como Pescadería e Castro, no grupo Brigantium, na avenida da Coruña, no Paseo da Tolerancia, en Fonte de Unta, na praza Alfonso IX, en Cruz Verde, no Camiño de Cal das Barras, na avenida de Castilla, en José Alguero Penedo, na rúa Rollo e en Alcalde López Datorre, ademais da urbanización de A Condesa.
Un dos puntos máis destacados do proxecto é a actuación na praza García Naveira e nos seus soportais, un dos espazos máis emblemáticos do centro histórico de Betanzos. Nestas áreas e na maior parte das zonas incluídas na obra instalaranse luminarias de tipo ambiental, completadas con proxectores, farois e sinais luminosas adaptadas ao contorno urbano e patrimonial.
O goberno local lembra que, nos últimos anos, Betanzos ten avanzado de forma significativa na renovación do alumeado exterior grazas ás distintas fases do programa do IDAE, co que xa se executaron actuacións en parroquias como Santiago de Betanzos, Santiago de Requián e Santo Estevo de Piadela, incluíndo zonas como Viuxe, Montellos ou Infesta.
Estas intervencións están cofinanciadas polo Programa Operativo FEDER de Crecemento Sostible 2014-2020, que apoia proxectos municipais de eficiencia enerxética e redución de emisións.
Na actualidade, Betanzos conta con 4 991 puntos de luz, dos que 4 688 corresponden a luminarias, e 97 centros de mando. Coa nova fase, o Concello agarda dar un novo paso na diminución do consumo eléctrico municipal, mellorar a iluminación en espazos residenciais, industriais e históricos e minimizar o impacto ambiental asociado á contaminación lumínica, en liña coas políticas estatais e europeas de aforro e eficiencia enerxética.