Betanzos acollerá o Fumega Fest, un novo referente do rock e metal alternativo
Betanzos converterase este verán nun punto de encontro clave para os amantes do rock e metal alternativo coa chegada do Fumega Fest, un festival innovador que busca marcar un antes e un despois na escena musical galega e estatal. A súa primeira edición celebrarase os días 4 e 5 de xullo nunha localización sen igual: o histórico Parque do Pasatempo, recentemente declarado Ben de Interese Cultural.
A proposta do Fumega Fest aposta por unha programación musical diferente, reunindo en Betanzos algunhas das mellores bandas europeas dos xéneros stoner, psych, space rock e post metal, estilos ata o de agora sen un espazo propio nos festivais galegos e españois. Segundo a organización, a confirmación dos artistas e a posta á venda das entradas terá lugar nos vindeiros días.
O obxectivo do Fumega Fest é consolidarse como un festival de referencia en Galicia e no Estado para os seguidores destes estilos musicais, que contan con grande acollida noutros puntos de Europa e Portugal. O evento inspírase en festivais xa consagrados como Roadburn, Desert Fest (celebrado en catro cidades europeas e Nova York), Sonic Blast ou DunaJam, buscando facerse un oco dentro do circuíto europeo de festivais de rock e metal alternativo.
O Fumega Fest está promovido por PlayPlan, unha promotora con ampla traxectoria na xestión de festivais como BIGSOUND Pontevedra, SonRías Baixas ou o Festival do Pasatempo, ademais de levar as carreiras de artistas galegos como Tanxugueiras, Caamaño&Ameixeiras, Vimbio, Sabela ou Hugo Guezeta. O festival conta co apoio institucional do Concello de Betanzos.