Deportes

A cita deportiva celebrarase no pavillón municipal José María Valeiro Iglesias 'Tocayo', cunha xornada que arrinca ás 9.00 horas e continúa pola tarde desde as 16.00

Betanzos converterase este sábado 31 de xaneiro no punto de encontro do taekwondo galego co Campionato Galego cadete e o Campionato Galego xunior (masculino e feminino), programados no Pavillón Municipal de Betanzos.

Segundo a Federación Galega de Taekwondo, a competición cadete comezará ás 9.00 horas, mentres que a categoría xunior está prevista desde as 16.00. A organización lembra que os horarios poden axustarse en función do número de participantes.

A convocatoria está dirixida a deportistas federados: no caso do cadete, poden competir os nados en 2012, 2013 e 2014, e no xunior os nados en 2009, 2010 e 2011. Haberá medallas para os tres primeiros clasificados en cada peso e trofeos por equipos, segundo recollen as bases da proba.

O campionato dispútase no pavillón municipal do Carregal, que desde 2025 leva oficialmente o nome de José María Valeiro Iglesias 'Tocayo'. A cita está organizada polo club Kwon por delegación da Federación Galega de Taekwondo.