Betanzos acende o Nadal con Carlos Arévalo, homenaxe ao Globo e preto de 700.000 luces LED
Betanzos puxo en marcha o Nadal co acendido do seu alumeado festivo na praza Irmáns García Naveira, nun acto no que o medallista olímpico e fillo predilecto da cidade, Carlos Arévalo, foi o encargado de premer o botón simbólico ás 19.00 horas. A praza encheuse de familias para seguir a conta atrás, coñecer o novo gran árbore luminoso de arredor de 16 metros situado no centro do espazo e desfrutar dunha chocolatada para as nenas e nenos, ademais de actuacións musicais en directo. Este ano, o Concello iluminará a cidade con preto de 700.000 puntos LED distribuídos en uns 4.600 metros cadrados de decoración.
Arévalo realizou o acendido acompañado pola alcaldesa, María Barral, que agradeceu ao piragüista a súa implicación coa cidade e co acto. A rexedora subliñou que o deportista 'representa os valores que queremos poñer en valor neste tempo: esforzo, superación, compañeirismo e amor pola terra que nos viu nacer', e cualificouno de 'orgullo para Betanzos e exemplo para a nosa mocidade, porque leva sempre o nome da cidade alá onde compite'.
Barral incidiu no carácter colectivo da celebración e lembrou que o Nadal é 'unha das épocas máis especiais e agarimosas do ano, un tempo para compartir, reencontrarnos e mirar ao noso arredor con máis ilusión'. Para a alcaldesa, o acendido 'non é só premer un interruptor', senón unha forma de 'acender tamén a esperanza, a alegría e as ganas de gozar de Betanzos', cunha iluminación que aspira a achegar luz aos días máis curtos e calor aos momentos máis fríos.
O acto serviu tamén para render homenaxe ao emblemático Globo de Betanzos, un aeróstato de papel non tripulado que se eleva cada 16 de agosto en honra a San Roque e que está considerado o globo de papel máis grande do mundo. A praza Irmáns García Naveira e o ámbito de Santo Domingo, escenario tradicional do lanzamento, contan este ano cun guiño especial a esta tradición máis que centenaria, nun contexto no que o Concello xa avanzou que o 2026 estará dedicado a esta seña de identidade local.
A iluminación navideña complétase con arcos e elementos decorativos en distintas rúas e barrios, co obxectivo de encher Betanzos de vida e dinamizar a actividade económica ao longo de toda a campaña. Barral animou a veciños e veciñas, así como ás persoas que se acheguen desde outros concellos, a pasear pola cidade, facer as compras de Nadal no comercio de proximidade e gozar da hostalaría local, mantendo vivo o tecido económico betanceiro ao abeiro dun Nadal que quere ser sinónimo de encontro e de rúa chea de xente.