Betanzos acelera a recuperación do Pasatempo, cunha obra que continuará a comezos de 2026 con novas fases por preto dun millón de euros
O Concello de Betanzos mantén en marcha a segunda fase dos traballos de mellora e recuperación do Parque do Pasatempo, unha intervención que suma 1,5 millóns de euros procedentes de fondos europeos que o Goberno central destina a actuacións en Bens de Interese Cultural (BIC), entre os que se inclúe este singular parque enciclopédico.
Segundo informou o consistorio, nesta etapa estanse a executar actuacións na primeira terraza, no estanque da Gruta, na Gruta Recolecta cos seus túneles, nas escaleiras de comunicación coa segunda terraza e no invernadoiro, ademais da recuperación da Fonte das Catro Estacións. Esta segunda fase conta cun orzamento de 489.000 euros.
A alcaldesa, María Barral, analizou o avance das obras co director xeral de Turismo, José Manuel Merelles, e ambos revisaron o calendario pendente ata cumprir os prazos marcados pola convocatoria, que sitúan o horizonte de execución ata mediados do vindeiro ano. O Concello admite que, pola complexidade dos traballos, existe certo atraso, aínda que a actuación está 'bastante avanzada', o que permitirá impulsar a contratación das fases seguintes a principios de 2026.
En concreto, a terceira e a cuarta fase (que suman arredor dun millón de euros dentro do paquete global) serán licitadas de maneira conxunta pola Xunta, do mesmo xeito que ocorreu nesta segunda fase. Nesas etapas, os traballos centraríanse en actuacións nas tres terrazas, na caverna, nos muros e na canalización das augas, ademais da recuperación ambiental do recinto.
A rexedora trasladou tamén a preocupación municipal polo axustado do calendario para cumprir os prazos vinculados aos fondos europeos, aínda que sinalou o compromiso expresado desde Turismo para axilizar as obras. Nesa liña, indicouse que, se quedase algunha actuación pendente, sería asumida con fondos propios da Xunta.
O Pasatempo, declarado BIC coa categoría de xardín histórico, é considerado pola Xunta un espazo 'único e sen igual' na xardinaría galega e un testemuño destacado da obra filantrópica do indiano Juan García Naveira, combinando elementos de xardinaría, arquitectura, escultura e pintura.
Desde o Concello lembran, ademais, que as intervencións en marcha non son as únicas realizadas nos últimos tempos. O goberno local apunta que, xunto a este proxecto financiado con fondos europeos, xa se avanzou na recuperación do Estanque do Retiro mediante un convenio coa Deputación da Coruña. Con todo, a administración municipal calcula que aínda quedará arredor dun 30 % do parque pendente de rehabilitar, para o que buscarán novas vías de financiamento en futuras fases.