Besteiro alerta de que os ‘orzamentos insuficientes’ da Xunta frean o novo Chuac e deixan sen resposta a emerxencia de vivenda na Coruña
secretario xeral do PSdeG, José Ramón Gómez Besteiro, cualificou de 'absolutamente insuficientes' os Orzamentos da Xunta para 2026 na provincia da Coruña e puxo como exemplo o atraso nas obras do novo Chuac. Lembrou que o hospital, que dá servizo a máis de medio millón de persoas de 36 concellos, tiña que estar rematado en 2027 segundo o compromiso inicial da Xunta, pero agora fíxase en 2031: 'E eu digo que nin no 31', advertiu. Tamén denunciou que os investimentos previstos para a modernización do complexo pasaron de máis de 100 millóns a 60 e agora quedan en algo máis de 40.
Besteiro sostén que esta redución de fondos está a afectar tanto aos pacientes, que acoden 'a unhas instalacións en obras permanentes', como ás máis de 8.000 profesionais da área sanitaria coruñesa. Engadiu que a mesma situación se produce noutros hospitais da provincia, como o Marcide en Ferrol, e que seguen sen resolverse deficiencias noutros complexos, como o Chus en Santiago. Ao seu xuízo, 'non hai unha aposta real pola sanidade pública'.
O líder socialista tamén puxo o foco na vivenda, que definiu como 'a maior preocupación social agora mesmo'. Sinalou que só na Coruña hai preto de 4.000 persoas demandando vivenda pública, e na provincia case 8.000, mentres a Xunta reserva arredor de 14 millóns para este obxectivo na cidade, 'dos cales a metade vén do Goberno central'. Criticou que esta cantidade 'é practicamente a mesma que achega o propio Concello', malia que o orzamento municipal é 37 veces máis pequeno ca o da Xunta. Rexeitou, ademais, a proposta de minipisos de 26 metros cadrados, que cualificou de 'zulos habitacionais'.
Pola súa banda, o secretario xeral provincial, Bernardo Fernández Piñeiro, acusou a Alfonso Rueda de 'usar as contas públicas para favorecer ao seu partido' nos concellos gobernados polo PP e pediu un sistema 'transparente e con criterios obxectivos' para a repartición de fondos. Criticou que a Xunta reparta menos de 120 millóns entre máis de 300 concellos, mentres a Deputación da Coruña destina 138 millóns a 92 municipios. Tamén advertiu de que os Orzamentos non atenden as urxencias educativas nin as infraestruturas prometidas, como a vía de alta capacidade Costa Norte, 'parada dende hai anos'.
Besteiro reclamou máis lealdade institucional e transparencia tras a negativa da Xunta a entregar ao Ministerio de Sanidade os datos de cribado de cancro de mama. 'Se todo está ben, cal é o problema en facilitar esa información?', preguntou. E avisou de que, onde goberna o PP, 'a sanidade pública se debilita cando se oculta información en lugar de compartila para mellorar o servizo'.