Bernardo Fernández Piñeiro renova como secretario xeral do PSdeG-PSOE da Coruña
Bernardo Fernández Piñeiro foi proclamado este martes secretario xeral do PSdeG-PSOE Provincial da Coruña tras concluír o prazo de presentación de precandidaturas sen que se rexistrase ningunha proposta alternativa.
A Comisión Provincial de Ética validou a súa precandidatura como a única presentada, polo que, conforme ao regulamento interno do partido, a proclamación foi automática sen necesidade de votación. O seguinte paso será a elección da nova Comisión Executiva Provincial, que se levará a cabo no Congreso Provincial previsto para o 11 de maio.
Fernández Piñeiro revalida deste xeito a súa responsabilidade á fronte da agrupación socialista na provincia, cargo que desempeña desde o ano 2022. Ademais, compaxina este labor coa súa función como alcalde de Pontedeume e como voceiro do Grupo Socialista e do Goberno na Deputación da Coruña.
O proceso de presentación de precandidaturas estivo aberto dende o luns 31 de marzo ata este martes 2 de abril ás 12.00 horas, sen que se presentase ningunha outra alternativa, consolidando así o liderado de Fernández Piñeiro no partido a nivel provincial.