Bernardo Fernández Piñeiro preséntase para revalidar a secretaria xeral do PSdeG provincial
Bernardo Fernández Piñeiro, actual secretario xeral do PSdeG-PSOE na provincia da Coruña e alcalde de Pontedeume, anunciou a súa pre-candidatura para revalidar o seu cargo nas próximas primarias. Precisamente este 31 de marzo comeza o prazo de presentación de pre-candidaturas, que culminará coas eleccións internas programadas para o 27 de abril.
Fernández Piñeiro, que lidera o partido na provincia dende 2022 e gañou a maioría absoluta en Pontedeume en 2015, revalidada en 2019 e 2023, tamén exerce como voceiro do Grupo Socialista na Deputación da Coruña. O seu obxectivo principal é seguir fortalecendo o partido na provincia, preparando a organización para gañar as próximas eleccións municipais e manter o goberno da Deputación.
“Durante estes anos, tratei de aplicar ao partido a mesma filosofía que aplico no meu Concello: proximidade cos problemas das agrupacións e da militancia, traballo duro, ambición e experiencia para facer un partido mellor e máis forte”, sinalou Fernández Piñeiro. O actual líder do PSdeG na Coruña subliñou que este é “un referente do municipalismo en España”, remarcando que "gobernamos a Deputación por terceiro mandato consecutivo xunto a Valentín González Formoso, un feito histórico sen precedentes".
O socialista destacou a diferenza do modelo de xestión da Deputación da Coruña fronte á Xunta, que, segundo el, adopta "un folla de ruta caciquil e partidista". "A Deputación axuda e colabora cos concellos con criterios de obxectividade, sen ter en conta a cor política dos gobernos municipais", afirmou. Ademais, Fernández Piñeiro lembrou que o partido gobernante tamén está presente en 31 concellos e na principal cidade da provincia, A Coruña, onde Inés Rey, ademais de ser alcaldesa, é vicepresidenta da Federación Española de Municipios.
Para o socialista, "este é o mellor exemplo do músculo do PSdeG, cimentado sen dúbidas no municipalismo, onde somos a principal forza de Galicia, gobernando á maioría dos galegos e galegas". Engade que é fundamental aproveitar todo este potencial para, a través do modelo municipalista, seguir fortalecendo o partido en todos os concellos da provincia e, polo tanto, mellorar o entorno e a calidade de vida dos coruñeses.
Fernández Piñeiro tamén enfatizou o seu compromiso de favorecer o crecemento do partido nos municipios onde se ten menos presenza, subliñando que "a incorporación de novos perfiles e de referentes dos diferentes concellos será unha liña estratéxica para conformar as candidaturas municipais, unha liña na que xa comezamos a traballar e que nos permitiu obter representación en diversas lexislaturas sen concelleiros".
"Durante estes catro anos seguiremos a traballar para fortalecer as comarcas como estruturas fundamentais de cohesión das agrupacións locais, clave para vertebrar a provincia. A captación de talento é outra das nosas principais liñas de actuación, para poñelo ao servizo das agrupacións e aproveitar o noso grande capital humano na mellora da organización", conclúe.