Bernardo Fernández Piñeiro destaca a unidade do PSdeG-PSOE na provincia da Coruña
Bernardo Fernández Piñeiro valorou positivamente a súa reelección como secretario xeral do PSdeG-PSOE Provincial da Coruña, ao non presentarse ningunha candidatura alternativa ao vindeiro congreso provincial.
"O feito de que non se presentase ningunha candidatura alternativa a este proceso é un respaldo ao traballo que vimos desenvolvendo ao longo destes últimos tres anos", sinalou o socialista, que é tamén alcalde de Pontedeume.
Fernández Piñeiro destacou o esforzo realizado para fortalecer as agrupacións locais co obxectivo de obter os mellores resultados electorais. "Non para ter o poder polo poder, senón porque estamos convencidos de que somos a mellor opción política para estar á fronte das institucións", explicou.
O secretario xeral subliñou a importancia do municipalismo dentro do PSdeG-PSOE. "O músculo do Partido Socialista está no municipalismo", afirmou, engadindo que as estruturas provinciais deben traballar especialmente nas zonas onde os resultados non foron favorables.
A súa xestión quedou reflectida nos resultados das últimas eleccións municipais, que permitiron ao PSdeG-PSOE gobernar na Deputación Provincial da Coruña por terceira lexislatura consecutiva, algo inédito na historia da institución. Ademais, gobernan a capital da provincia e outros 30 concellos da provincia, a pesar de perder algúns gobernos por mocóns de censura, como a de Muxía, onde se produciu un pacto entre o BNG e o PP.
Fernández Piñeiro destacou que a Deputación da Coruña "vai repartir por primeira vez máis recursos con criterios obxectivos entre os 93 concellos da provincia que os que reparte a Xunta entre todos os concellos de Galicia".
"Entendemos que os concellos, independentemente de por quen estean gobernados, deben contar con recursos", afirmou, comparando esta política coa posición do presidente da Xunta, Alfonso Rueda, sobre o financiamento autonómico. "Requírelle ao Estado que haxa un criterio de reparto xusto e igual entre todas as autonomías, pero en Galicia non aplica ese principio cos concellos", criticou.
Por último, subliñou que "todos os concellos desta provincia reciben o triple de recursos da Deputación que os que recibían cando gobernaba Diego Calvo" e reafirmou o seu compromiso de seguir traballando para "antepoñer os intereses dos veciños e veciñas por riba de calquera outra cuestión".