Bergondo remite á Xunta o Plan Director da senda peonil da AC-164 e pide executar con urxencia o tramo de Santa Marta
O Concello de Bergondo trasladou formalmente á Consellería de Vivenda e Planificación de Infraestruturas o Plan Director para construír unha senda peonil na estrada autonómica AC-164 (Guísamo-Ínsua), un eixo que enlaza A Coruña con Ferrol. O documento fixa un custo total estimado de 1.587.315,77 euros, distribuído en catro fases, e supón (segundo o goberno local) o cumprimento do compromiso adquirido na reunión do 15 de abril de 2025 entre a alcaldesa e a conselleira María Martínez Allegue, na que se acordara que o Concello elaboraría o estudo previo para definir tramos e orzamentos.
No escrito remitido á Xunta, Bergondo solicita que, dentro do proxecto global, se dea prioridade ao Tramo 4, cifrado en 531.269,58 euros. O executivo municipal xustifica a petición na necesidade de dar continuidade ás beirarrúas xa existentes e garantir un itinerario seguro que conecte á veciñanza da Costa de Santa Marta cos servizos públicos básicos. A demanda, engade, coincide coas peticións rexistradas por residentes da zona, que levan tempo reclamando esta infraestrutura.
O Concello insiste en que a AC-164 é unha vía de carácter estruturante, cunha Intensidade Media Diaria superior aos 12.000 vehículos, e que en varios puntos carece de espazos seguros para desprazarse a pé, o que obriga a camiñar por beiravías moi estreitas e incrementa o risco viario. Ademais, lembra que ao longo do seu trazado sitúanse servizos como a Casa do Concello, Correos, o centro de saúde ou entidades bancarias, o que xera desprazamentos frecuentes a pé, e que tamén é un itinerario habitual para clubs ciclistas.
O Plan Director divide a actuación en catro tramos, co seguinte reparto económico:
- Tramo 1: 511.202,86 euros
- Tramo 2: 92.366,05 euros
- Tramo 3: 199.040,31 euros
- Tramo 4: 531.269,58 euros (prioridade solicitada)
Esta petición á Xunta chega nun contexto no que Bergondo vén reforzando a súa liña de actuación en materia de mobilidade e seguridade peonil. Sen ir máis lonxe, esta semana o Concello licitou por 512.849,65 euros a renovación de beirarrúas e servizos na AC-162 entre A Lagoa e o límite con Sada, unha obra que inclúe saneamento, abastecemento, iluminación e a reposición de pavimentos, ademais dun miradoiro na contorna de Gandarío. O goberno local subliña que, sumadas a outras intervencións recentes e ás previstas para 2026, estas actuacións buscan mellorar a seguridade e a accesibilidade nos puntos de maior tránsito do municipio.