Bergondo reivindica a memoria, o presente e o futuro das mulleres no 8M
Bergondo conmemora este 8M cunha campaña centrada no papel das mulleres de onte, de hoxe e de mañá. Baixo o lema 'As mulleres que fomos, as que somos e as que virán', o Concello quere poñer en valor o fío invisible que une as distintas xeracións de veciñas do municipio e reivindicar a súa achega á construción dunha sociedade máis xusta e igualitaria.
A iniciativa institucional apoia a súa mensaxe en tres ideas principais. A primeira, 'as mulleres que fomos', rende homenaxe ás avoas e pioneiras que abriron camiño en tempos máis difíciles co seu esforzo, a súa resiliencia e un traballo moitas veces silenciado. Nese recoñecemento sitúase tamén a figura de Filomena Dato, lembrada recentemente no municipio.
O segundo eixo, 'as que somos', pon o foco nas mulleres bergondesas da actualidade, destacando a súa forza, o seu talento e a súa pluralidade nun momento no que continúan sostendo a vida social e conquistando novos espazos. A terceira idea, 'as que virán', mira xa cara ao futuro e expresa o compromiso de deixarlles ás nenas e ás mozas un Bergondo máis libre, máis xusto e máis igualitario.
Para trasladar esta reivindicación á programación do Día Internacional da Muller, o Concello deseñou varias propostas arredor de dous grandes bloques: a creación literaria e o benestar integral. Entre as actividades destaca o certame de relatos 'Bergondo en feminino', unha convocatoria pensada para dar voz ás vivencias, ás historias e ás reflexións das mulleres, ao tempo que promove a creatividade e contribúe a construír un relato colectivo sobre a realidade feminina.
A programación inclúe tamén a actividade 'Escolas de Saúde para a Muller', un ciclo de charlas gratuítas co que se busca fomentar a educación sanitaria no municipio desde unha perspectiva de xénero e sexo. As sesións celebraranse na Biblioteca A Senra os días 12 de marzo e 21 de abril, ás 19.00 horas, e estarán impartidas pola farmacéutica Alejandra Fontán Otero.
Durante estas xornadas abordaranse cuestións como a menopausa, o risco cardiovascular nas mulleres, a osteoporose e o impacto da dor crónica e da enxaqueca. Con esta programación, Bergondo quere facer do 8M non só unha data de reivindicación, senón tamén unha oportunidade para recoñecer o legado das mulleres do municipio e seguir avanzando en igualdade.