‘Bergondo en Feminino’ puxo en valor a igualdade entre homes e mulleres no ámbito empresarial
O salón de actos da Asociación de Empresarios do Polígono de Bergondo (ASEB) acolleu hoxe a última acción do programa ‘Bergondo en Feminino’, impulsado desde a concellaría de Servizos Sociais do Concello de Bergondo, un almorzo temático denominado ‘Empresarias, feminino plural’, centrado na igualdade na empresa.
A alcaldesa de Bergondo, Alejandra Pérez Máquez, presentou este almorzo e, posteriormente, realizouse unha mesa redonda na que empresarias e representantes de institucións relataron as súas vivencias e o que supón ser muller para desempeñar os distintos postos que ostentan. Participaron: Ángeles Santos Casal, de Genesal Energy e xerente de ASEB; Marcela Parga Fernández, fundadora e CEO de Parga Asociados; Almudena Rodríguez Casal, CEO de ASR Asesores; Oliva García Trasancos, presidenta provincial e secretaria nacional de Protección Civil; Serezabel Rodríguez Rico, técnica de Servizos Sociais do Concello de Bergondo; Olga Romasanta Iglesias, de Rexenerando S. Coop. Galega; e Julia Nogueira Domínguez, técnica de intervención social da Fundación Mujeres.
Nesta sexta edición do programa ‘Bergondo en Feminino’, o obxectivo é achegar o programa aos distintos estratos da sociedade bergondesa. Agora achégase ao sector empresarial e antes realizáronse charlas dirixidas ao profesorado e alumnado dos centros educativos e ao funcionariado municipal.
Está previsto realizar un evento de peche desta sexta edición do programa no que participen todos os sectores que se teñen implicado, ademais de entregar os premios do certame literario de foto-relatos. Terá lugar o venres 30 de maio en horario de tarde no edificio sociocultural da Senra.
Bergondo en feminino
Esta iniciativa foi premiada a finais de 2023 pola Federación Española de Municipios y Provincias (FEMP) e pola Delegación do Goberno contra a Violencia de Xénero no VII Concurso de boas prácticas locais contra a violencia sobre as mulleres.
Creado en 2019, o seu obxectivo é rescatar a historia de bergondesas pioneiras, e en moitos casos esquecidas, que loitaron para abrir o camiño e gozar da sociedade que temos hoxe en día.
Entre as iniciativas desenvolvidas baixo o paraugas deste programa están o renomeamento de sete centros sociais do Concello con nomes de veciñas ilustres, a realización de rutas centradas na vida das homenaxeadas ou a elaboración dun mapa virtual interactivo poñendo en valor a vida de 15 bergondesas.