Bergondo celebra a segunda edición do ‘Día do Deporte’ con máis de dez disciplinas para probar
O Concello de Bergondo organiza o sábado 26 de abril a segunda edición do ‘Día do Deporte en Bergondo’, unha xornada aberta á veciñanza na que se poderá participar en diversas actividades deportivas e desfrutar de exhibicións dos clubs participantes.
O evento terá lugar no Albergue de Gandarío e dará comezo ás 12.00 horas cunha serie de exhibicións a cargo do Club Atlético Bergondo, Skapaos de Bergondo, Ausarta Bergondo, CBM Oleiros, Club Salvamento Sada e a APA “As Mariñas” do CPI Cruz do Sar.
Ademais de asistir ás demostracións, as persoas asistentes poderán probar ata 13 disciplinas deportivas distintas, entre as que se atopan escalada, tiro con arco, triciclos, parkour e skate, volei, tenis, bádminton, florball, kin-ball, goal-ball, minigolf, kayak e xogos populares.
O horario da xornada será de 12.00 a 14.00 e de 15.30 a 18.00 horas. Durante o descanso, de 14.00 a 15.30 horas, ofrecerase un menú con callos, pizza e froita. Para poder acceder a esta comida, será necesario recoller un ticket previamente na Casa da Cultura entre o 7 e o 11 de abril, en horario de 9.30 a 14.30 horas. Tamén existirá a posibilidade de levar comida propia ás zonas habilitadas no albergue.
A inscrición poderá realizarse tanto no momento de recoller o ticket de comida como o propio día do evento no espazo designado para tal fin. Como requisito, todas as persoas menores de 14 anos deberán estar acompañadas por unha persoa adulta responsable.
Esta iniciativa conta coa colaboración do CBM Oleiros, o Club Salvamento Sada, o Club Rítmica Ausarta, o Club Ciclista Skapaos, a Asociación Cultural, Recreativa e Deportiva de Boxing As Mariñas, o Club Atlético Bergondo, a APA “As Mariñas” do CPI Cruz do Sar e Protección Civil de Bergondo.