Bergondo busca unha solución estable para o Club de Remo Olímpico do Mandeo entre reclamacións do BNG e límites legais en O Pedrido
O futuro do Club de Remo Olímpico do Mandeo centra o debate en Bergondo. Despois de que o BNG solicitase á Xunta apoio urxente e propuxese habilitar un parque de botes como medida temporal, o Concello fixo público o seu posicionamento: trasladou o seu recoñecemento ao traballo deportivo e social do club e defendeu que leva anos ofrecéndolle apoio, con acceso a instalacións municipais como o pavillón de Guísamo ou o ximnasio, do mesmo xeito que ao resto de entidades locais.
O goberno municipal lembra que cando o club decidiu afincarse en Bergondo xa non existía unha infraestrutura específica para deportes náuticos. Nun primeiro momento empregáronse as antigas naves do Pedrido, unha solución que tiña data de caducidade pola rexeneración ambiental impulsada por Costas e que incluía a súa demolición ao rematar as concesións. Tras abandonar recentemente unha parcela privada por motivos alleos á administración local, o Concello nega falta de colaboración e explica que, a día de hoxe, non foi posible habilitar unha base provisional conforme á legalidade vixente.
Segundo a información trasladada por Costas, a construción dun edificio de ata 300 metros cadrados en primeira liña da ría presenta un encaixe moi complexo na ZEC Betanzos-Mandeo e, ademais, O Pedrido non é zona portuaria senón praia, ámbito no que este tipo de infraestruturas adoitan quedar fóra de autorización. Calquera actuación precisaría, en todo caso, o visto bo expreso da Demarcación de Costas, polo que o Concello aposta por solucións que garantan estabilidade xurídica e viabilidade a medio prazo.
A alcaldesa, Alejandra Pérez Máquez, traballa en dúas vías: a creación dun edificio público multiusos de servizo á praia —que sirva tamén de base para o salvamento— no que se reserve un espazo para almacenamento de embarcacións; e a negociación coa propiedade de Fenosa para obter a cesión parcial dunha parcela no Pedrido que permita deseñar unhas instalacións máis completas. O executivo local advirte de que ningunha destas alternativas, nin sequera a formulada polo propio club se resultase viable, podería executarse a curto prazo.
O Concello insiste en que comparte o obxectivo de unha solución estable e adecuada dentro dos marcos legais e urbanísticos e mantén o diálogo co Club de Remo Olímpico do Mandeo e co resto do tecido deportivo. Pola súa banda, o BNG mantén a súa chamada á Xunta para un apoio inmediato e a posta en marcha dun parque de botes que asegure a continuidade da actividade mentres se avanza cara a unha sede definitiva.