Bergondo busca novos investimentos en infraestruturas coa colaboración da Xunta
O Concello de Bergondo dá un paso máis cara á mellora das súas infraestruturas co obxectivo de impulsar o benestar da veciñanza e fortalecer o desenvolvemento do municipio. A alcaldesa, Alejandra Pérez, mantivo unha reunión en San Caetano coa conselleira de Vivenda e Planificación de Infraestruturas, María Martínez Allegue, para avanzar en posibles liñas de colaboración entre o Goberno galego e a administración local.
Durante o encontro, ambas representantes abordaron diversas propostas e necesidades do municipio coruñés, poñendo o foco en actuacións que poderían mellorar significativamente a calidade de vida en Bergondo. A conselleira destacou a disposición da Xunta a colaborar cos concellos para sacar adiante proxectos que permitan modernizar os servizos e infraestruturas públicas.
Martínez Allegue puxo en valor a cooperación institucional como ferramenta esencial para “impulsar iniciativas que respondan ás demandas reais da cidadanía e que contribúan a reforzar a competitividade dos municipios galegos”.