Bergondo activa un plan de mellora de camiños municipais por preto de 570.000 euros
O Concello de Bergondo ultima a posta en marcha dun plan integral para renovar camiños de titularidade municipal cun investimento total de 568.411,14 euros. A actuación agrupa dous proxectos complementarios orientados a mellorar de maneira notable o estado do viario rural, reforzando a seguridade, a durabilidade dos firmes e as condicións de circulación no día a día.
As intervencións repartiranse polas parroquias de Ouces, Lubre, Bergondo, Moruxo, Santa Marta de Babío, Rois, Vixoi e Guísamo, e afectarán tanto a núcleos con poboación consolidada como a vías que funcionan como conexións clave dentro do municipio. Segundo explica o goberno local, a selección dos tramos responde a criterios técnicos, como o uso habitual destas vías, o seu papel na conectividade entre lugares e a coordinación con redes de abastecemento e saneamento executadas recentemente.
O plan contempla a renovación dos firmes con solucións adaptadas ás características de cada tramo. Haberá pavimentación con aglomerado asfáltico, tratamentos superficiais mediante regas asfálticas e, nalgúns puntos condicionados por cuestións patrimoniais, pavimento de formigón. De forma complementaria, realizaranse traballos de limpeza e perfilado de cunetas, regularización das plataformas, reparación de fochancas e bordos, melloras de drenaxe e axustes de cota en tapas e arquetas xa existentes. O conxunto das obras completarase con sinalización vertical e horizontal para reforzar a seguridade viaria durante e despois da execución.
Desde o executivo municipal sinalan que este programa supón 'un paso adiante no mantemento e na modernización das infraestruturas locais', co obxectivo de mellorar a calidade de vida da veciñanza e garantir unha mobilidade máis segura e eficiente en todo o termo.
Camiños incluídos no plan (por parroquias):
- Ouces: Silvoso, Tatín.
- Lubre: Dornas, Dornas a Sada, A Campiña, A Campiña a Guinlle, Guinlle, Armuño, Armuño a Espírito Santo, Espírito Santo, Casal da Agra, Campo de Leis, Sanín.
- Bergondo: San Cidre, A Longueira.
- Moruxo: Fiobre, Fiobre a Montecelo.
- Santa Marta de Babío: O Casal Norte, O Casal Sur.
- Rois: Rois, Monte da Brea.
- Vixoi: Pisón, Trasdoval, Vixoi.
- Guísamo: Baldomir, A Feira a Baldomir, A Brea, San Paio, Pedras Brancas.