Bergondo activa tres obras en Santa Marta e Gandarío
Nestes días comezaron en Bergondo tres actuacións de mellora en espazos públicos de Santa Marta e Gandarío, co dobre obxectivo de reforzar a seguridade viaria e modernizar os equipamentos municipais.
A intervención de maior alcance é a rehabilitación enerxética do Centro Social de Santa Marta. O proxecto, licitado en xuño e adxudicado a finais de agosto, conta cun orzamento base de 133.849,32 euros e persegue mellorar o confort interior e a eficiencia do edificio respectando o seu uso e estética tradicional. A adxudicación formalizouse por 128.963 euros tras concorreren tres ofertas.
En paralelo, o Concello executa a substitución do tellado da antiga escola de Santa Marta. A obra inclúe a retirada da cuberta e do soporte deteriorados, a colocación dunha nova cuberta e a mellora do illamento para gañar eficiencia enerxética. O contrato saíu a concurso por 21.380 euros.
A terceira actuación céntrase na rotonda da AC-162 en Aldea Cornide (Gandarío), onde se renovarán as varandas para incrementar a seguridade peonil nun punto moi transitado. Esta mellora figura entre os investimentos aprobados polo goberno local esta primavera e foi posteriormente licitada como obra específica de seguridade viaria.
Estas obras súmanse a outras intervencións recentes na contorna de Gandarío, como a reparación da beirarrúa afundida en A Lagoa e o reforzo do talude executado pola Xunta na AC-162, co obxectivo de estabilizar o terreo e protexer o paseo.