Bergondo activa a oitava edición dos Orzamentos Participativos con 100.000 euros para a mellor proposta de 2026
O Concello abre unha nova convocatoria dos Orzamentos Participativos 2026, reservando 100.000 euros para executar a mellor proposta viable recibida. O obxectivo é dar voz á cidadanía e canalizar iniciativas que melloren o municipio.
Poderán presentarse suxestións de interese xeral ou parroquial que sexan viables, dependan do Concello e que asine persoal empadroado ou residente en Bergondo. As ideas que non encaixen estritamente nos requisitos poderán valorarse noutros plans de investimento ou incorporarse a solicitudes de subvención.
As propostas poderán enviarse ata o 24 de outubro mediante formulario: no Rexistro, a través da sede electrónica, nos buzóns dos centros sociais de cada parroquia ou por correo electrónico a correo@bergondo.gal.
Unha vez analizadas, escoitarase unha proposta entre as que cumpran criterios e axusten ao orzamento de 100.000 euros. O 31 de outubro publicarase o resultado na web municipal e nas redes sociais.
Ademais, recoñeceranse as mellores ideas con bonos para o comercio local: a proposta seleccionada recibirá un vale de 100 euros e as seis seguintes obterán 50 euros cada unha.