Bergondo acollerá o Campionato Galego de Raid de Orientación un esixente desafío na natureza
A pista deportiva da Senra foi o escenario da presentación oficial do Campionato Galego de Raid de Orientación 'Bergondo Raid', unha proba de alta esixencia que combina modalidades como BTT, carreira a pé e kayak. O evento, que se celebrará no municipio o próximo 12 de abril, reunirá a máis de 40 equipos procedentes de Galicia e Asturias.
O acto contou coa presenza da alcaldesa de Bergondo, Alejandra Pérez Máquez; a concelleira de Deportes, Patricia Vázquez; o director de carreira, Pablo Franco; Richi Figueroa, en representación da empresa organizadora MarMar Outdoor; e Claudia Oreiro, como parte da Federación Galega de Orientación.
A proba percorrerá un total de 70 quilómetros, poñendo en valor os paraxes naturais do Concello de Bergondo. Os participantes deberán completar o percorrido coa única axuda de mapas e brúilas, nun desafío que esixirá estratexia e resistencia física.
O campionato contará con tres categorías de diferente nivel de dificultade, permitindo a participación tanto de deportistas experimentados como de aqueles que buscan iniciarse na disciplina. Ademais, inclþse a categoría de promoción 'Orientaraid', cun percorrido reducido de 35 quilómetros, deseñado especialmente para quen desexa iniciarse na orientación deportiva.
Entre os participantes destacan equipos de renome no circuíto internacional, como os galegos Keltoi Team e Endurance, así como o equipo asturiano Corremontes, que actualmente compiten en probas da Copa do Mundo.
Desde a organización confirmaron que todos os preparativos e percorridos están listos, á espera do peche de inscricións, que permanecerán abertas ata o próximo domingo, 6 de abril.
A alcaldesa de Bergondo, Alejandra Pérez Máquez, destacou a importancia de acoller eventos desta magnitude no municipio: "O 'Bergondo Raid' é unha oportunidade única para dar a coñecer a riqueza natural do noso concello e fomentar o deporte ao aire libre. Agardamos que esta proba sexa un éxito e que tanto participantes como espectadores gocen da experiencia".
Pola súa banda, o director de carreira, Pablo Franco, subliñou o nivel competitivo do evento: "Deseñamos un percorrido esixente pero accesible, que porá a proba as habilidades dos equipos. Contamos coa participación de grandes equipos e estamos seguros de que será unha carreira emocionante". Ademais, engadiu que "ata agora temos case 40 equipos inscritos e de aquí ao peche de inscricións agardamos chegar aos 50 equipos".