Bergondo abre o prazo para solicitar as axudas de desprazamento escolar do curso 2025-2026
O Concello de Bergondo puxo en marcha unha nova convocatoria de axudas económicas para desprazamentos escolares dirixida ao alumnado empadroado na localidade que curse desde Educación Infantil ata estudos universitarios, Formación Profesional, ensinanzas de réxime especial, programas internacionais oficiais ou outros estudos homologados.
A partida total destinada a estas subvencións ascende a 15.000 euros. As contías varían segundo a distancia do desprazamento: desde un máximo de 40 euros para traxectos de 1 a 3 km dentro de Galicia ata 150 euros para percorridos de 81 a 170 km. Para desprazamentos a outras comunidades autónomas a axuda poderá chegar a 200 euros, mentres que para programas internacionais oficiais acada os 600 euros.
As persoas interesadas poderán presentar as súas solicitudes desde o xoves 7 de agosto ata o 10 de outubro, segundo recolle o Boletín Oficial da Provincia.