Benigno López Moure gaña o VII Premio Daniel Domínguez de Guión en Galego coa obra 'Monstros'
Benigno López Moure é o gañador do VII Premio Daniel Domínguez de Guión en Galego, que convoca a Asociación Galega de Guionistas co patrocinio da Xunta de Galicia, pola súa obra titulada 'Monstros'. O comité avaliador subliñou do texto o dominio impecable dos códigos do thriller, a profundidade psicolóxica dos personaxes e a valentía de abordar unha temática incómoda desde unha mirada autoral que afonda na complexidade moral da historia. Na edición deste ano tamén foron distinguidas as outras dúas obras finalistas: 'Amparo, pero non olvido', de Luis Miles, e 'Onda tras onda', de Daniel Cornes, o que confirma a boa saúde creativa do guión en galego dentro do sector audiovisual.
O fallo do xurado deuse a coñecer no acto de entrega celebrado ao mediodía na sede da SGAE en Santiago de Compostela, nun encontro que reuniu a profesionais vencellados á escrita e á creación audiovisual. No evento participou o director da Axencia Galega das Industrias Culturais, Jacobo Sutil, quen aproveitou a ocasión para reiterar o apoio do Goberno galego ao labor da escrita individual como punto de partida determinante dos proxectos que máis tarde chegan con éxito ás pantallas. O premio, consolidado xa como unha referencia para os guionistas que traballan en galego, busca ao tempo impulsar o uso da lingua propia e dar visibilidade ao talento creativo que se desenvolve neste ámbito.