Bebeto deixa a súa firma no Libro de Ouro municipal de Abegondo
Abegondo acolleu este fin de semana a visita de Bebeto, a icónica figura do Deportivo, que foi recibido oficialmente no salón de plenos da Casa do Concello polo alcalde, José Antonio Santiso, onde deixou a súa firma no Libro de Ouro municipal.
Durante o encontro, Santiso destacou a importancia de Bebeto para o club e para a afección, lembrando que “ti es un mito do noso amado Deportivo, pero o máis importante é a pegada emocional que aínda segues deixando en todos nós”. O rexedor engadiu que os veciños de Abegondo lle teñen “un cariño especial” e valoran a súa visita ao Concello.
O ambiente na sala reflectía ese recoñecemento cara a Bebeto, un dos grandes referentes recentes do club coruñés. Pola súa parte, o ex xogador agradeceu a recepción e resaltou a aposta do Deportivo pola cidade deportiva de Abegondo e o proxecto Dépor Training Center, que será fundamental para o desenvolvemento da canteira e o futuro deportivo do equipo.
O alcalde lembrou tamén que esta visita ten un grande significado para Abegondo, xa que nas súas instalacións adestran tanto o primeiro equipo como as categorías inferiores do Deportivo.
A presenza de Bebeto en Abegondo forma parte da súa estadía en A Coruña, onde presentou recentemente a súa biografía autorizada ‘Bebeto, o home que acariñou o gol’, no estadio de Riazor.