Bebeto asina no Libro de Ouro de Abegondo nunha visita institucional ao Concello
O Concello de Abegondo acollerá este domingo unha visita moi especial. A lenda do Deportivo da Coruña Bebeto participará nun acto institucional na Casa do Concello, onde será recibido polo alcalde, José Antonio Santiso, e asinará no Libro de Ouro do municipio ás 13.00 horas, no salón de plenos.
Segundo informou o Concello, trátase dun acto aberto ao público no que a veciñanza poderá achegarse para saudar ao exdianteiro brasileiro, que tamén departirá coas persoas asistentes unha vez rematada a sinatura. Prevese que o salón de plenos se encha de afeccionadas e afeccionados deportivistas, así como de veciños e veciñas que queren agradecerlle a súa vinculación histórica coa Coruña e coa comarca.
A visita de Bebeto a Abegondo enmárcase na súa estadía estes días na Coruña, onde presentou a súa biografía autorizada 'Bebeto, el hombre que acunó el gol' no estadio de Riazor, nun acto no que o exfutbolista se amosou moi emocionado ao lembrar a súa etapa no Deportivo e a figura de Arsenio Iglesias. Ademais, o campión do mundo con Brasil en 1994 participa no acendido das luces de Nadal na praza de María Pita, consolidando aínda máis o seu vínculo coa cidade.
Abegondo, sede da cidade deportiva do Deportivo e do recente proxecto Dépor Training Center, recibe así unha das figuras máis queridas da época do Súper Dépor, que marcou unha etapa inesquecible na historia do club coruñés. O Concello subliña que a visita ten un forte valor simbólico para un municipio estreitamente ligado ao club, xa que nas súas instalacións adestran os primeiros equipos e a canteira branquiazul.
Durante o acto, o alcalde José Antonio Santiso trasladaralle a Bebeto o agradecemento da veciñanza polo seu legado deportivo e pola pegada emocional que deixou en toda unha xeración de seareiros. A sinatura no Libro de Ouro recollerá este recoñecemento institucional e deixará constancia da ligazón do exxogador co municipio das Mariñas coruñesas.