Bebeto acenderá o alumeado do Nadal na Coruña o 28 de novembro en María Pita
A Coruña estreará a iluminación de Nadal o venres 28 de novembro cun convidado moi especial: Bebeto, un dos futbolistas máis emblemáticos da historia do Real Club Deportivo, será quen prema o botón do acendido na praza de María Pita, acompañado por nenas e nenos da cidade. O acto repetirase no mesmo escenario do ano pasado e abrirá oficialmente a programación festiva do municipio. Desde a Alcaldía sublíñase a ilusión por contar cunha figura tan querida para a veciñanza nun momento tan sinalado do calendario.
Antes do acendido haberá unha animación para todos os públicos, con concurso de debuxo e sorteo entre as crianzas participantes: as gañadoras e gañadores poderán compartir con Bebeto o instante de poñer en marcha as luces do Nadal na fachada consistorial.
A presenza do exdiante brasileiro completarase cun coloquio con estudantes de centros públicos o xoves 27 de novembro no auditorio do Centro Sociocultural Ágora, organizado polo Concello. A sesión afondará nos valores do deporte aplicados á vida e á escola, e incluirá unha quenda aberta de preguntas para que o alumnado dialogue con Bebeto.
Chegado ao Dépor no verán de 1992 procedente do Vasco da Gama, José Roberto Gama de Oliveira, 'Bebeto', foi Trofeo Pichichi no seu primeiro curso na liga e marcou a todos os rivais daquela tempada. En catro campañas como branquiazul sumou 102 goles en 154 encontros oficiais e converteuse nunha peza clave do Súper Dépor, que alzou a Copa do Rei (1995) e a Supercopa de España. Campión do mundo con Brasil en 1994, a súa ligazón co club e coa cidade mantense intacta décadas despois, converténdoo nun símbolo eterno do deportivismo.