Bebeto acende o Nadal na Coruña cunha explosión de tres millóns de luces
O Nadal xa brilla na Coruña. José Roberto Gama de Oliveira, Bebeto, foi o encargado de premer este venres o botón que puxo en marcha o acendido navideño na praza de María Pita, nun evento no que tamén quedou inaugurado o Mercado de Nadal. A alcaldesa, Inés Rey, acompañou ao histórico dianteiro do Deportivo nun acto no que tamén participaron o gañador e os finalistas do tradicional Concurso de Postais do Concello.
Desde hoxe, a cidade luce preto de tres millóns de puntos led e arredor de medio milleiro de arcos luminosos distribuídos polos dez distritos coruñeses. O investimento municipal anual para o acendido acada os 770.000 euros. Entre as figuras máis destacadas volven estar a gran esfera da dársena da Marina e a árbore xigante de luces, que este ano se traslada ao Parrote debido ás obras de reurbanización dos Cantóns.
A decoración inclúe tamén os teitos de luz da rúa Real e da praza de Azcárraga e engade unha novidade na entrada pola avenida de Alfonso Molina. No barco Atalaya, símbolo de benvida á cidade, instaláronse motivos luminosos cos tres Reis Magos. Ademais, na contorna da fonte de Catro Camiños incorpóranse iluminacións en forma de paraugas en cores brancas e azuis, recuperando un dos emblemas das celebracións deportivas do Deportivo.
En total, o Concello instalou este ano preto de 560 arcos luminosos e centos de adornos adicionais repartidos polos principais puntos de cada barrio.
A programación cultural e festiva inclúe preto de 300 eventos repartidos ata o 5 de xaneiro. Haberá concertos, espectáculos teatrais, festivais, visitas guiadas, propostas para público infantil, galas e numerosas actividades nos centros cívicos e asociacións veciñais, que tamén recibirán as visitas de Papá Noel e os Reis Magos.
A praza de María Pita acollerá novamente actuacións de corais, panxoliñas, representacións teatrais e un concerto de Cántigas da Terra. Os principais espazos culturais da cidade, como o Coliseum, o Teatro Colón, o Rosalía, o Ágora ou o Fórum Metropolitano, ofrecerán unha programación variada pensada para todas as idades.