Entrega de tres vivendas públicas rehabilitadas reforce a aposta polo alugueiro accesible no casco histórico
A conselleira de Vivenda e Planificación de Infraestruturas, María M. Allegue, entregou hoxe as chaves de tres novas vivendas públicas en alugueiro accesible no casco histórico de Betanzos, rehabilitadas ao abeiro do programa Rexurbe. Trátase de inmobles situados na Venela dos Clérigos e na rúa Cerca, en edificios con preto de cen anos de historia e en ámbitos de alta relevancia patrimonial.
As vivendas foron sorteadas entre persoas inscritas como demandantes de vivenda pública, unha delas menor de 36 anos, á que este piso lle permitirá emanciparse. Allegue salientou que son inmobles 'que merecían unha segunda oportunidade e que, grazas ao Rexurbe, se converten no fogar de novas familias, mantendo viva a identidade arquitectónica e histórica de Betanzos'.
Durante o acto, no que tamén participou a alcaldesa, María Barral, a rexedora volveu pedir á Xunta que amplíe o radio de compra de vivendas dentro do plan Rexurbe a máis rúas do casco histórico, máis alá do ámbito da rúa da Cerca e arrabaldes. Barral lembrou as dificultades detectadas nas últimas convocatorias para que os propietarios de inmobles nesas zonas poidan ofrecer vivendas que se axusten ás condicións da Consellería e insistiu en que 'coa demanda de alugueiro existente é necesario dar un paso máis e incorporar novos inmobles ao parque público'.
A conselleira anunciou que a comezos de 2026 está prevista a entrega doutras dúas vivendas públicas en rehabilitación nas rúas Alfolí e Pinche, xa en fase final de obra. Enmarcou estas actuacións no compromiso do Goberno galego de duplicar o parque público de vivenda: ás 3.000 vivendas xa en marcha en distintas fases de execución sumaranse 1.000 fogares máis en 2026, ata chegar ás 4.000 comprometidas para esta lexislatura.
Allegue avanzou que a Xunta destinará no ano 2026 un total de 350 millóns de euros a políticas de vivenda, dos que 163 millóns se investirán na creación de novos fogares. Tamén puxo o foco no incremento, ata os 4,8 millóns de euros, da dotación das axudas para a compra de vivenda en áreas históricas. No caso de Betanzos, pola súa condición de zona Rexurbe, poderanse recibir ata 15.000 euros por vivenda. Desde 2022, doce persoas beneficiáronse xa desta liña, cun volume de axudas que supera os 125.000 euros.
No ámbito da rehabilitación, a titular de Vivenda lembrou que se duplicará o orzamento das Áreas de Rehabilitación Integral supramunicipais da Ribeira Sacra e do Camiño de Santiago, que pasarán a contar con 2 millóns de euros para favorecer a mellora de vivendas en parroquias como Requián e Tiobre, por onde discorre a vía xacobea ao seu paso por Betanzos. Ademais, a ARI específica de Betanzos dispón dun convenio en execución por máis de medio millón de euros, igualmente destinado á recuperación de fogares.
Alén da política de vivenda, Allegue referiuse ás actuacións previstas na estrada AC-542 ao seu paso por Infesta. Anunciou que o Consello da Xunta leva este luns a aprobación do proxecto de trazado para mellorar a seguridade viaria e a accesibilidade peonil neste treito. 'É un trazado froito da escoita e do diálogo co Concello, coa veciñanza e con entidades como Stop Accidentes', apuntou.
As obras, que se licitarán ao longo de 2026, contarán cun orzamento superior a 1,4 millóns de euros. O proxecto incorpora propostas do proxecto piloto elaborado por Stop Accidentes na contorna do centro Pai Menni e inclúe medidas como a habilitación dun carril central de xiro á esquerda para o acceso desde a AC-542 á N-VI en dirección A Coruña, así como a ordenación de prazas de aparcamento. Ademais, prevese un itinerario peonil continuo ao longo dos primeiros 2,4 quilómetros da vía e melloras na visibilidade dos distintos accesos, co obxectivo de reforzar a seguridade de vehículos e peóns.