Autobuses e taxis substituirán os trens na estación coruñesa polas obras de Adif
Renfe porá en marcha un plan alternativo de transporte por estrada os días 27 e 28 de marzo para garantir a mobilidade dos viaxeiros mentres Adif executa traballos na estación da Coruña incompatibles coa circulación ferroviaria. A interrupción afectará aos últimos trens da tarde do venres 27 con destino á cidade e ás circulacións con orixe ou destino na estación coruñesa ata o mediodía do sábado 28.
Segundo explica a compañía, o operativo inclúe 53 autobuses e 10 taxis para cubrir 27 servizos afectados, co obxectivo de manter as conexións entre A Coruña e Santiago de Compostela, Ferrol e Rábade, en ambos sentidos.
O corte obrigará tamén a reaxustar a oferta das liñas de Media Distancia que enlazan A Coruña con Vigo, Santiago, Ferrol e Lugo, así como a conexión de alta velocidade con Madrid. Renfe advirte de que o transbordo por estrada incrementa os tempos de viaxe e pode provocar cambios operativos, incluíndo adiantos dalgunhas saídas desde A Coruña para manter os horarios das paradas intermedias e chegadas máis tardías do habitual.
A interrupción enmárcase nas actuacións de remodelación da terminal e nos traballos necesarios para habilitar un desvío ligado ao futuro acceso ferroviario ao Porto Exterior. Adif, pola súa banda, mantén abertas distintas fases da obra na estación intermodal, coa construción de novos andéns e a ampliación e renovación das instalacións.