ASPACE Coruña reclama máis recursos polo Día Mundial da Parálise Cerebral para afrontar o envellecemento das persoas afectadas
Con motivo do Día Mundial da Parálise Cerebral, que se conmemora o 6 de outubro, ASPACE Coruña demanda máis recursos especializados da Administración para garantir unha atención adecuada ao envellecemento das persoas con parálise cerebral, baseándose nos principios de vida independente.
Baixo o lema da campaña "Envellecer. Decidir. Vivir", a asociación busca poñer en valor as principais preocupacións das persoas afectadas, cuxo envellecemento adoita comezar arredor dos 35 anos. Ademais, a campaña tamén aborda as inquietudes das familias, centradas na continuidade dos coidados e no desenvolvemento dos seus propios proxectos vitais. A figura do asistente persoal preséntase como clave para garantir a vida independente en todas as etapas.
O acto oficial de ASPACE Coruña terá lugar o mércores 2 de outubro na sede da asociación, debido ao cambio de ubicación causado polas condicións meteorolóxicas. No evento, que contará coa presenza do alcalde Benito Portela, realizaranse intervencións institucionais e a lectura dun manifesto ás 12:00 horas. A celebración busca concienciar sobre a necesidade de apoios personalizados e flexibles para asegurar un futuro digno para as persoas con parálise cerebral.
As actividades deste día enmárcanse na campaña "Envellecer. Decidir. Vivir", desenvolvida en colaboración coa Confederación ASPACE, para sensibilizar á sociedade sobre os retos do envellecemento das persoas con parálise cerebral e a importancia de promover a súa autonomía.