ASPACE Coruña celebra unha gran festa de Entroido nos seus centros

Realizáronse diversas actividades, como un obradoiro de antiface, unha obra de teatro e actuacións musicais

ASPACE Coruña celebrou unha gran festa de Entroido en todos os seus centros. Pola mañá realizáronse diversas actividades, como un obradoiro de antiface, unha obra de teatro e actuacións musicais, contando coa presenza da propia Shakira e de King África.

Xa pola tarde tivo lugar o desfile de disfraces, ao que tamén asistiron as familias. Entre os disfraces destacaron un numeroso grupo de bombeiros, personaxes da saga de Harry Potter e o colorido Entroido de Brasil. O premio ao Grupo Máis Animado foi para o Centro Residencial, o premio ao Disfraz Máis Elaborado foi para o Centro de Día e a Mellor Posta en Escena foi para o Centro Educativo. A festa finalizou cunha gran merenda con chocolate e sobremesas típicas destas datas.