Infraestructuras

O Goberno local replica ao BNG que xa se emendou coa Deputación o trámite das axudas afectado por incidencias informáticas e garante que a obra se fará igualmente con fondos municipais

O Concello de Culleredo confirmou que seguirá adiante co proxecto de restauración da Torre de Celas, unha intervención valorada en 160.000 euros que pretende recuperar tanto o interior como o exterior do monumento e, ao tempo, mellorar o parque que o rodea para realzar o seu valor patrimonial.

Segundo explicou o alcalde, José Ramón Rioboo, a actuación busca ‘poñer en valor a riqueza artística’ da torre e ‘facilitar que estea a disposición da cidadanía’, cunha proposta que non se limita ao inmoble senón que abrangue tamén o seu entorno inmediato.

O Goberno local saíu ao paso das declaracións do BNG sobre a convocatoria provincial de subvencións para bens patrimoniais e indicou que xa se concretou coa Deputación a subsanación do trámite de solicitude, despois de que varias administracións non puidesen formalizala no prazo inicial por problemas informáticos.

Desde o Concello lembran, ademais, que estas axudas se conceden por concorrencia competitiva, polo que non está garantido nin que Culleredo resulte beneficiario nin que a contía que poida obterse sexa suficiente para completar os traballos. Por iso, o executivo municipal recalca que a restauración está asegurada ‘si ou si’ coa achega dos fondos municipais necesarios, con independencia de que finalmente chegue a subvención.

O proxecto contempla corrixir filtracións e problemas de humidade actuando nos lucernarios e no sistema de recollida de pluviais da cuberta. No interior, prevese substituír e reparar elementos deteriorados, como a estrutura de viguetas de madeira, partes metálicas, escaleiras e iluminación. No exterior, realizarase unha limpeza da fachada e eliminarase a vexetación adherida.

A intervención complétase coa mellora do parque que rodea a torre, coa execución de camiños en xabre e a renovación de iluminación, mobiliario urbano e axardinamento. O obxectivo é reforzar a lectura histórica do conxunto e facer máis accesible e atractivo o espazo.

A Torre de Celas fora rehabilitada en 1992 a través dunha escola obradoiro promovida polo Concello, pero co paso do tempo o inmoble foi sufrindo un deterioro progresivo, especialmente no interior. O monumento formaba parte dunha antiga fortaleza defensiva aos pés do monte Xalo e, historicamente, vixiaba a ruta entre A Coruña e Santiago. Ten planta de 8x8 metros, está construída en granito e xa aparece citada en documentación do ano 1395.