As xornadas 'O rural galego en feminino' poñen o foco na ecoloxía rural e no papel das mulleres esta fin de semana na Coruña e en Irixoa
A delegación de ADEGA na Coruña presenta esta fin de semana as xornadas 'O rural galego en feminino', un encontro que busca visibilizar e poñer en valor as traxectorias de mulleres referentes no tecido rural galego e reflexionar sobre o seu papel na ecoloxía rural e na defensa do territorio.
A primeira parte da programación desenvolverase o sábado 29 no centro cívico da Cidade Vella (rúa Veeduría, nº 2), cun completo programa de intervencións que abrangue experiencias profesionais, análises académicas e visións ecofeministas vinculadas ao mundo rural. A sesión de mañá incluirá relatorios de investigadoras, activistas e responsables de proxectos rurais, mentres que a tarde estará dedicada a un obradoiro práctico orientado ao emprendemento feminista.
As xornadas, que contan coa colaboración do Concello da Coruña, nacen coa vocación de funcionar como un espazo de encontro e reflexión, destacando o papel fundamental das mulleres como axentes de cambio, innovación e sustentabilidade no rural galego.
O domingo completarase a programación cunha visita guiada á Granxa Ecolóxica de Lousada, en Irixoa, considerada un proxecto referente en produción sustentable e prácticas agroecolóxicas. A saída está prevista para as 16.00 h e é preciso inscribirse previamente.