As tres primeiras carteiras do concello reciben o recoñecemento de Mulleres de Arteixo 2025
O Concello de Arteixo organiza unha serie de actividades para celebrar o Día Internacional da Muller, destacando representacións teatrais e a IX Xornada "Arteixo Activo... en Feminino", que se celebrará o 28 de marzo no Centro Tecnolóxico de Arteixo.
A programación comezará coa iluminación da fachada do Concello e continuará con dúas obras de teatro dirixidas ao alumnado dos IES do municipio. O 13 de marzo representarase Golpes, da compañía aAntena, mentres que o 20 de marzo terá lugar a obra A Nai, de Amorodio Teatro, gañadora do premio Luísa Villalta a proxectos de igualdade.
O 28 de marzo celebrarase a IX Xornada "Arteixo Activo... en Feminino", un evento no que se recoñecerán as Mulleres de Arteixo 2025. As homenaxeadas serán Carmen Mañana Varela, Maruja Iglesias Rodríguez e Pilar Iglesias Rabuñal, as primeiras mulleres titulares de carteiras no Concello de Arteixo.
A xornada incluirá unha mesa redonda sobre a importancia da perspectiva de xénero nos medios de comunicación, coa participación de María Nieto, directora de E-Me Comunicación, e Rosa Pumar, directora de estratexia de marca en Demadi. A inscrición para asistir ao evento é obrigatoria e pode realizarse a través do código QR dispoñible no cartel ou presencialmente no CIM, ata completar aforo.
Esta iniciativa conta co apoio da Xunta de Galicia, a Deputación da Coruña e o Pacto de Estado contra a Violencia de Xénero.