As promesas do hóckey a patíns daranse cita na Coruña no XII Torneo do Eixo Atlántico
A cidade da Coruña será este fin de semana o escenario do XII Torneo do Eixo Atlántico de hóckey a patíns, unha competición consolidada no calendario deportivo da eurorrexión Galicia–Norte de Portugal. Nesta edición participarán 140 xogadores e xogadoras de categoría infantil procedentes de 14 equipos de Galicia e do norte de Portugal.
Os partidos disputaranse nos días 6 e 7 de decembro en tres recintos deportivos da cidade: o Palacio dos Deportes de Riazor, a Polideportiva nº1 de Riazor e o Pavillón Polideportivo de Monte Alto. A maioría dos equipos visitantes estarán aloxados no cuartel de Atocha, na Coruña, e no albergue xuvenil de Gandarío, en Bergondo, desde onde serán trasladados en autobús ás sedes de competición.
A fase de grupos desenvolverase durante o sábado con 24 encontros repartidos entre os tres pavillóns. Xa pola tarde, celebraranse os partidos que decidirán os equipos que accederán á final. As semifinais están programadas para as 20:00 horas do sábado, mentres que a final terá lugar o domingo ás 16:00 horas no Palacio dos Deportes de Riazor. A entrega de trofeos está prevista para as 17:00 horas.
O sorteo do torneo celebrouse este martes no propio Palacio dos Deportes, nun acto no que participou o concelleiro de Deportes, Manuel Vázquez. O edil destacou que esta competición “consolida a Coruña como referente na organización de eventos deportivos que combinan competición, convivencia e valores, nun espazo no que mozos e mozas galegos e portugueses poden compartir experiencias a través do deporte”.
Este torneo enmárcase na estratexia do Goberno de Inés Rey para potenciar a proxección internacional da cidade como sede de eventos deportivos e para seguir fomentando a práctica do deporte en idade escolar, promovendo a cooperación e o intercambio entre territorios da eurorrexión Galicia-Norte de Portugal.