As Fervenzas do Zarzo convértense en aula ao aire libre para o turismo do futuro
A Senda das Fervenzas do Zarzo, en Irixoa, converteuse estes días nun espazo de formación para o alumnado de Turismo da Universidade da Coruña. A actividade foi impulsada pola Reserva da Biosfera Mariñas Coruñesas como continuidade das sesións desenvolvidas en BioCultura e buscou achegar o estudantado a un modelo de ecoturismo vencellado ao coñecemento do territorio, á interpretación ambiental e á posta en valor do patrimonio natural.
A xornada contou coa colaboración da Facultade de Turismo da UDC e co guiado de 77 Turismo de Betanzos, unha das empresas certificadas coa Marca de Calidade da Reserva. A entidade da Biosfera puxo o foco no papel da formación para construír un turismo máis sustentable, mentres que a empresa betanceira achegou a súa experiencia en visitas guiadas e produtos de ecoturismo ligados ao territorio das Mariñas.
A elección das Fervenzas do Zarzo non foi casual. Este espazo natural de Irixoa foi obxecto en 2025 dun acondicionamento paisaxístico e ambiental promovido pola propia Reserva da Biosfera en colaboración co Concello, cunha actuación orientada a compatibilizar a conservación do enclave co uso turístico ordenado. A intervención permitiu recuperar un tramo de senda branda, mellorar a accesibilidade e incorporar elementos interpretativos para divulgar os valores naturais e históricos da contorna.
A actividade encaixa na estratexia da Reserva da Biosfera Mariñas Coruñesas, declarada pola UNESCO en 2013 e integrada por 17 concellos da contorna coruñesa, entre eles Irixoa. O organismo leva tempo reforzando a súa aposta pola formación, a educación ambiental e a profesionalización da oferta turística, un camiño que tamén quedou patente nas propostas presentadas este mes en BioCultura arredor da sustentabilidade turística e o ecoturismo.
Con iniciativas coma esta, a Reserva busca que os futuros profesionais do sector coñezan sobre o terreo os recursos cos que traballarán mañá. A saída a Zarzo serviu así para vincular universidade, empresas locais e espazos naturais nun mesmo itinerario formativo, cunha idea de fondo clara: que o turismo do futuro se constrúe desde o respecto á paisaxe e á identidade de cada lugar.