As estrelas entran nas aulas de Culleredo para achegar o ceo nocturno á infancia
O ceo nocturno converterase nas próximas semanas nunha ferramenta educativa para o alumnado de Culleredo. O Concello impulsará a actividade 'Estrelas que contan historias', unha iniciativa incluída no programa municipal EducaCulleredo coa que os nenos e nenas de 2º de Educación Primaria poderán achegarse á observación astronómica sen saír das súas aulas.
A proposta levará aos colexios un planetario portátil capaz de recrear o firmamento en condicións de escuridade, de forma que o estudantado poida identificar estrelas, familiarizarse coas constelacións e descubrir como diferentes civilizacións miraron ao ceo ao longo da historia para orientarse, interpretar o mundo ou organizar a vida cotiá.
A actividade combinará así divulgación científica e patrimonio, xa que tamén permitirá ao alumnado elaborar o seu propio planisferio celeste e entender a relación entre a observación do firmamento e a historia das sociedades. O programa está dirixido a 206 escolares dos colexios de Tarrío, Sofía Casanova, Isaac Díaz Pardo, Ría do Burgo e Vila de Rutis, e desenvolverase entre o 16 de marzo e o 9 de abril.
A iniciativa encaixa ademais no valor que o ceo nocturno ten no territorio das Mariñas. A Reserva de Biosfera Mariñas Coruñesas e Terras do Mandeo, da que forma parte Culleredo, obtivo en 2023 a certificación como Destino Turístico Starlight, un distintivo vencellado á calidade do firmamento para a observación astronómica.
Con esta proposta, o Concello reforza a vertente educativa de EducaCulleredo, un plan co que busca complementar a formación regrada con actividades ligadas ao patrimonio, á convivencia e ao coñecemento da contorna.