Eventos | Cultura

As sesións serán do 9 ao 19 de febreiro ás 17.30 horas, para nenos e nenas a partir de 6 anos, con inscrición previa e prazas limitadas

A rede de bibliotecas públicas municipais do Concello de Oleiros organiza unha programación especial de Entroido con obradoiros de creación de máscaras 'pop up' dirixidos a crianzas a partir de 6 anos. As actividades desenvolveranse entre o 9 e o 19 de febreiro, con inicio ás 17.30 horas e unha duración de 120 minutos por sesión.

Para participar é imprescindible inscribirse na biblioteca na que se celebre cada obradoiro. O aforo está limitado a 20 nenos e nenas por quenda, polo que cómpre reservar praza de maneira presencial ou chamando ao teléfono correspondente. As inscricións poden facerse desde 10 días antes da data de cada actividade.

O Concello lembra tamén que as crianzas deberán estar acompañadas por unha persoa adulta no recinto da biblioteca ata que remate o obradoiro.

Calendario e bibliotecas:

• 9 de febreiro: Biblioteca Mª José Ruso (Dorneda) (981 626 638)
• 10 de febreiro: Biblioteca Manuel María (Oleiros) (981 610 700)
• 11 de febreiro: Biblioteca Rosalía de Castro (Santa Cruz) (981 626 338)
• 12 de febreiro: Biblioteca Central Rialeda (981 639 511)
• 13 de febreiro: Biblioteca Mª José Trincado Mera (981 628 507)
• 18 de febreiro: Biblioteca Ánxel Fole (Nós) (981 664 257)
• 19 de febreiro: Biblioteca Xograr Mendiño (Lorbé) (981 618 201)