Artes pola Integración 2025 na Coruña: programación, horarios e sedes da 14ª edición
A cidade celebra esta fin de semana a 14ª edición de Artes pola Integración, o festival máis veterano de Galicia en artes inclusivas (creado en 2012). O encontro busca visibilizar talento artístico fóra dos circuítos habituais e dar espazo a persoas e proxectos a miúdo excluídos socialmente. Nesta edición as sedes serán a praza das Conchiñas e o Fórum Metropolitano, mentres que o sábado a programación viaxa a Santiago de Compostela.
O venres 19, ás 20.30 horas no Fórum Metropolitano, a compañía Teatro de los Invisibles representará Contención mecánica, unha peza que denuncia o uso de suxeicións en psiquiatría —práctica sinalada pola ONU como tortura en 2013—.
O domingo 21 toda a actividade desenvolverase na praza das Conchiñas. Abrirá a xornada a exposición A mocidade crea, froito do proxecto de artes e deseño en contornas rurais A pequena Bauhaus (xunto á asociación Sacra Experience). Entre 12.00 e 14.00 horas celebrarase un concurso de pezas para a comunidade (danza, música e/ou teatro) para grupos de 2 a 4 intérpretes; o xurado escoitará até 10 propostas e premará 3 pezas con 500 euros cada unha. Ás 13.30 horas, o Colectivo Diversos presenta Tempo de soñar, unha creación de danza-teatro inclusiva que aborda a violencia de xénero desde testemuños en primeira persoa e ofrece unha mirada esperanzadora. O peche será ás 18.00 horas con Seguir siendo niños, obra dirixida por Alma García e interpretada por nenas e nenos de 10 a 14 anos tras unha residencia en Pincelo.
O concelleiro de Cultura e Turismo, Gonzalo Castro, salientou que a elección de espazos públicos “busca achegar a creación á rúa e favorecer a integración a través das artes escénicas, visuais, narrativas e plásticas”.