Arteixo volve a 1900 cunha feira multitudinaria e ambiente de época
Arteixo viaxou no tempo esta fin de semana coa XXIV Feira Histórica 'Arteixo 1900', que encheu o paseo fluvial e as prazas do centro de público caracterizado e moitas ganas de desfrutar. A edición deste ano estivo dedicada a 'Cousas de Aldea' e serviu para lembrar a Alfonso Daniel Rodríguez Castelao no 75 aniversario do seu pasamento, con propostas que evocaron a Galicia de comezos do século XX.
O programa combinou mercado tradicional, ambientación de rúa, obradoiros e actuacións musicais que animaron as noites con grupos como De Vacas, Catuxa Salom, Os do Fondo da Barra, A Quinkillada e Leria na Praza do Balneario, ademais de pasarrúas, teatro e a popular 'Cea baile 1900' no Pazo dos Deportes. Durante o día, o público gozou de exhibicións e escenas costumistas, así como de espazos gastronómicos como a Taberna de Picadillo e o Furancho dos Baños.
A gran novidade foron 'As Aldeadas', unhas primeiras olimpíadas rurais que reuniron equipos veciñais en probas de habilidade e forza —desde o lanzamento de marco ata a carreira de carretillas ou o tiro da corda— e que concentraron numerosos curiosos no Campo da Igrexa. A acollida foi moi alta e converteuse nun dos momentos máis celebrados polo público.
A organización instalou ademais un Punto Violeta na Praza do Balneario para prevención e atención fronte á violencia machista, reforzando o carácter familiar e seguro da cita. En conxunto, a feira rexistrou unha afluencia moi notable ao longo das tres xornadas e deixou unha sensación xeral de éxito entre visitantes, asociacións e comerciantes participantes.