Arteixo propón novas actuacións urbanas cun modificado de crédito que irá a pleno
O Concello de Arteixo levará ao pleno unha modificación de crédito coa que pretende financiar novos proxectos e reforzar investimentos xa en marcha. Entre as actuacións previstas figuran a construción de dúas sendas peonís con carril bici no polígono de Sabón e a creación dun novo aparcadoiro na rúa Sinforiano López, así como o impulso a obras estratéxicas como a mellora da travesía principal do núcleo urbano ou a recuperación do complexo Balneario.
O modificado contempla unha partida para a primeira fase da humanización da travesía de Arteixo, que afectará a 1,8 dos 3,3 quilómetros totais deste vial, cun orzamento de 3,9 millóns de euros. Tamén se prevé a fase final do proxecto de rehabilitación do complexo Balneario: por unha banda, a reforma das plantas primeira e segunda do edificio principal (1,9 millóns de euros), e por outra, a intervención integral na Casa de Baños (2,9 millóns de euros).
O documento que se someterá a votación tamén recolle reforzos en servizos ambientais, como a recollida porta a porta de papel, cartón e vidro en negocios e establecementos hostaleiros. Así mesmo, destínanse 100.000 euros á elaboración da cartografía vinculada ao futuro Plan Xeral de Ordenación Municipal.
Dúas novas sendas peonís e ciclistas executaranse no polígono de Sabón, unha na avenida da Praia cun investimento de 1,1 millóns de euros, e outra na avenida do Encoro, cun orzamento de 670.000 euros. Ambas estarán integradas na contorna natural, aproveitando os espazos arborados e achegándose ao encoro do Rexedoiro, co obxectivo de crear áreas de lecer e mellorar a mobilidade alternativa.
As actuacións inclúen tamén a cobertura de cunetas para mellorar a seguridade, mediante a instalación de canalizacións soterradas e sumidoiros. Desde o goberno municipal explican que con estas obras se busca "crear unhas áreas máis humanizadas e urbanas e potenciar a mobilidade alternativa peonil".
Ademais, sinalan que o redeseño dos espazos non implicará a perda de prazas de estacionamento; ao contrario, está previsto un incremento na zona próxima á praia. Tamén se actuará no acceso á mesma, ampliando a plataforma para vehículos e mellorando o paso peonil.
Con este conxunto de investimentos, o executivo local reafirma a súa intención de avanzar cara a un modelo urbano máis amable, funcional e sostible.