Arteixo inaugura o Mercado do Nadal no paseo fluvial da Igrexa con Papá Noel e o Carteiro Real
O Concello de Arteixo, coa colaboración da Deputación da Coruña, prepara xa o Nadal 2025 cun completo programa no paseo fluvial da Igrexa, escenario do Mercado do Nadal, da Casiña de Papá Noel e da Casiña do Carteiro Real. A inauguración do mercado será o 5 de decembro de 2025 ás 19.00 horas.
Os postos do Mercado do Nadal abrirán os sábados e domingos de 11.30 a 14.30 horas e de 17.00 a 21.00 horas, mentres que de luns a venres funcionarán en horario de tarde, de 17.00 a 21.00 horas. Ademais, establécense horarios especiais de mañá, de 11.30 a 14.30 horas, para os mércores 24 e 31 de decembro e para o luns 5 de xaneiro, co obxectivo de facilitar as compras de última hora.
A Casiña de Papá Noel permanecerá aberta desde o 6 ata o 24 de decembro de 2025. Nese período, os sábados e domingos atenderá o público infantil de 11.30 a 13.30 horas e de 17.30 a 20.30 horas, mentres que os xoves e venres o horario será de 17.30 a 20.30 horas.
Unha vez rematadas as visitas a Papá Noel, será a quenda do Carteiro Real, que recollerá as cartas dirixidas aos Reis Magos na súa propia casiña. Este espazo abrirá do 26 de decembro de 2025 ao 5 de xaneiro de 2026, tamén no paseo fluvial da Igrexa. Os sábados e domingos funcionará de 11.30 a 13.30 horas e de 17.30 a 20.30 horas, e os xoves e venres en horario de tarde, de 17.30 a 20.30 horas.
Co Mercado do Nadal e estas dúas casiñas, Arteixo consolida unha programación pensada para dinamizar o comercio local, ofrecer ocio en familia e encher de ambiente festivo un dos espazos máis céntricos do municipio durante todas as festas.