Arteixo impulsa unha nova cartografía para un municipio máis verde
O Concello de Arteixo adxudicou á empresa Idyma-Núcleo Galicia a actualización da cartografía municipal cun investimento de 61.600 euros. Este proxecto permitirá elaborar unha infraestrutura verde que reestruture a rede de zonas naturais, seminaturais e áreas verdes, tanto no entorno urbano como rural.
Entre os obxectivos destaca a mellora do inventario dos bens municipais e o apoio ao desenvolvemento das actividades urbanísticas, integrando a natureza como un elemento clave para o benestar da cidadanía. Ademais, esta actuación busca conservar o patrimonio natural do concello e adaptar o territorio aos retos que supón o cambio climático.
Con esta iniciativa, o Concello pretende contribuír a unha mellor calidade de vida para os veciños e veciñas, promovendo un modelo de cidade máis sostible e respectuoso co medio ambiente.