Arteixo e Ordes apostan pola defensa persoal feminina con dous cursos gratuítos este outono
Arteixo e Ordes reforzan nas vindeiras semanas a súa oferta de formación en igualdade e prevención da violencia machista con dous cursos de defensa persoal dirixidos especificamente a mulleres.
No caso de Arteixo, o Centro de Información ás Mulleres (CIM) impulsa un novo taller de defensa persoal Krav Maga para mulleres e nenas de entre 12 e 18 anos, que terá lugar o sábado 29 de novembro de 2025, no CEIP Arteixo, en horario de 11.00 a 14.00 horas.
As persoas interesadas poden inscribirse ata o 21 de novembro no propio CIM de Arteixo, chamando ao teléfono 981 60 14 15 ou a través do correo electrónico muller@arteixo.org.
O obradoiro combinará contidos teóricos e prácticos sobre defensa persoal feminina, incluíndo técnicas básicas de vixilancia e prevención, traballo sobre os límites físicos, medidas de protección ante unha posible agresión e consellos para reaccionar e, de ser o caso, desarmar a un agresor. Trátase dunha actividade gratuíta orientada a reforzar a seguridade e a autoconfianza das participantes.
Pola súa banda, Ordes acollerá o sábado 13 de decembro un curso intensivo de defensa persoal feminina no ximnasio Campomaior, na vila ordense, organizado pola Consellería de Política Social e Igualdade en colaboración co Concello e a Mancomunidade de Municipios da Comarca de Ordes. A formación desenvolverase en horario de mañá e tarde, de 9.30 a 14.00 e de 15.00 a 18.30 horas.
As mulleres interesadas en participar xa poden inscribirse nas oficinas do CIM comarcal, situadas na avenida Alfonso Senra 106, 2º A (Ordes), ou ben a través do teléfono 981 681 108 e do correo electrónico cim@mancomunidadeordes.gal.
Tanto o taller de Arteixo como o curso de Ordes son gratuítos e enmárcanse nas políticas de igualdade e prevención da violencia de xénero que desenvolven os concellos e a Mancomunidade, poñendo o foco na capacitación das mulleres para mellorar a súa percepción de seguridade, a súa capacidade de reacción e a súa autonomía en situacións de risco.