Arteixo dá comezo á transformación urbana e humanización da Travesía de Arteixo
O Concello de Arteixo vén de dar un paso decisivo na primeira fase do ambicioso proxecto de humanización da Travesía de Arteixo coa sinatura dos primeiros convenios de cesión anticipada con varios propietarios afectados. Estes acordos, de carácter voluntario, permitirán ao consistorio dispoñer dos terreos necesarios para o desenvolvemento das obras, garantindo ao mesmo tempo a conservación da edificabilidade das parcelas, situadas nunha das zonas con maior proxección urbanística do municipio.
A actuación inicial abranguerá o tramo comprendido entre a rotonda de Sabón e o cruzamento das rúas Reconquista e Independencia. Trátase dun percorrido de preto de 1,8 quilómetros que se considera o máis urxente de intervención, debido á súa elevada densidade poboacional, xa que nesta travesía residen ao redor de 2.600 veciños. O orzamento base de licitación, previsto para este ano, ascende a 3,6 millóns de euros.
O proxecto, que se desenvolverá en tres fases, contempla a total urbanización dunha vía clave no mapa viario de Arteixo, cunha lonxitude total superior aos 3,3 quilómetros. A proposta inclúe a creación de novas prazas de aparcamento, zonas de descanso para peóns e a mellora da circulación mediante novas rotondas. O obxectivo é claro: mellorar a mobilidade, a seguridade viaria e a calidade do espazo urbano.
En liña coa estratexia municipal de revitalización dos espazos públicos, esta actuación busca impulsar unha transformación sostible, accesible e centrada nas necesidades reais da veciñanza. Entre as melloras previstas atópanse a ampliación e continuidade das beirarrúas, a reorganización das prazas de estacionamento, a renovación do firme e dos pavimentos, e a adaptación da sinalización tanto horizontal como vertical ao novo deseño da rúa.
Ademais, a rede de iluminación pública será obxecto dunha renovación integral, incorporando tecnoloxía LED para unha maior eficiencia enerxética e sustentabilidade ambiental.
O alcalde de Arteixo, Carlos Calvelo, destacou que esta intervención “pretende mellorar unha zona moi habitada do casco urbano e continuar con solucións integrais de urbanización que repercutan directamente na calidade de vida da cidadanía”. Con este proxecto, Arteixo dá un paso firme cara a unha cidade máis amable, segura e pensada para as persoas.