Arteixo convoca o XXI Concurso de Escaparates de Nadal con 3.650 euros en premios
O Concello de Arteixo, a través da Concellería de Promoción Económica, vén de convocar o 'XXI Concurso de Escaparates do Nadal 2025', unha iniciativa que busca dinamizar o pequeno comercio local e poñer en valor a creatividade dos establecementos durante as festas. Poderán participar todos aqueles comercios, negocios de servizos persoais e locais de hostalaría que desenvolvan a súa actividade no termo municipal e teñan o escaparate decorado con motivos de Nadal, como mínimo, entre o 5 de decembro de 2025 e o 7 de xaneiro de 2026.
A inscrición é gratuíta e deberá formalizarse mediante a presentación da solicitude oficial, dispoñible como anexo nas bases, no Rexistro do Concello de Arteixo ou a través da sede electrónica municipal. O prazo para anotarse abrirase o 1 de decembro de 2025 e permanecerá dispoñible ata o 14 de decembro, ambos días incluídos. A documentación tramítase a través da Concellería de Promoción Económica, con sede na avenida Arsenio Iglesias, no polígono industrial de Sabón, e tamén se ofrece información de contacto no correo emprego@arteixo.org
e no teléfono 981 65 91 47.
O certame reparte un total de 3.650 euros en premios. Establécese un primeiro premio ao mellor escaparate dotado con 1.000 euros, un segundo galardón de 800 euros e un terceiro premio de 500 euros. Ademais, haberá un accésit á orixinalidade valorado en 450 euros e un premio específico por votación popular de 900 euros. Todas estas contías están suxeitas ás retencións fiscais que marque a normativa vixente e aboaranse ás persoas gañadoras mediante transferencia bancaria.
As decoracións participantes serán visitadas e avaliadas polo xurado a partir do 17 de decembro de 2025, entre as 18.00 e as 21.00 horas, ampliándose a visita a días sucesivos se fose necesario. O tribunal estará integrado por dúas persoas procedentes do ámbito comercial e artístico, especializadas en escaparatismo e merchandising, e por un técnico ou técnica do Departamento de Promoción Económica, que actuará como secretario ou secretaria do xurado.
A valoración profesional terá en conta criterios como a imaxe comercial e presentación do produto, a creatividade, o impacto visual e a iluminación do escaparate, cun máximo de 4 puntos en cada apartado. O accésit de orixinalidade decidirase especificamente segundo este último criterio. Pola súa banda, na modalidade de votación popular, os veciños e veciñas poderán emitir o seu voto a través da páxina web municipal, na URL de Promoción Económica, desde a publicación da relación de establecementos admitidos ata as 23.59 horas do 25 de decembro de 2025.
Os premios concederanse a partir da combinación da puntuación outorgada polo xurado profesional e dos votos recibidos na modalidade popular. O resultado final do concurso farase público na web do Concello de Arteixo. Antes de confirmar os galardóns comprobarase que as persoas ou empresas propostas están ao día das súas obrigas tributarias e coa Seguridade Social e non teñen débedas por reintegro de subvencións co Concello. A participación no concurso implica a aceptación íntegra das bases e a cesión dos dereitos de uso das fotografías dos escaparates, exclusivamente para a difusión desta convocatoria, ademais do cumprimento da normativa de protección de datos persoais recollida na documentación oficial.