Arteixo conmemora o 25N con teatro, andaina e obradoiros organizados polo CIM
O Centro de Información ás Mulleres de Arteixo organiza un amplo programa de actividades para conmemorar o Día Internacional da Eliminación da Violencia contra as Mulleres, que se estenderá entre o 21 e o 29 de novembro. A iniciativa combina propostas culturais, accións formativas e actividades ao aire libre co obxectivo de sensibilizar a toda a veciñanza fronte ás violencias machistas.
O venres 21 dará comezo a programación coa representación da obra As agoridas, da compañía Teatro Ningures, no auditorio do Centro Cívico Cultural de Arteixo. Ao día seguinte, sábado 22, celebrarase a VII Andaina contra a violencia de xénero, cun percorrido urbano duns catro quilómetros e saída ás 10.00 horas desde o Campo da Festa. O evento está aberto a todos os públicos e rematará cunha chocolatada con churros e música dun DJ. As 500 primeiras persoas anotadas recibirán un agasallo conmemorativo.
O martes 25 iluminarase a fachada do Concello de cor violeta e impartiranse obradoiros sobre igualdade e prevención da violencia de xénero nos centros educativos do municipio.
As actividades continuarán o sábado 29 cun taller de defensa persoal KRAV MAGA dirixido a mulleres e nenas maiores de 13 anos. Ademais, durante todo o mes manterase aberta no Centro Cívico Cultural de Arteixo a exposición Chicas nuevas 24 horas, baseada no documental de Mabel Lozano, que aborda a explotación e trata de mulleres e nenas.
A programación completa pode consultarse no enlace facilitado polo Concello. Segundo os datos oficiais do Ministerio de Igualdade, no que vai de 2025, 22 mulleres foron asasinadas en España por violencia de xénero e en Galicia rexístranse máis de 6.200 casos activos no sistema VioGén.
O Concello de Arteixo reafirma así o seu compromiso coa igualdade e coa loita contra a violencia machista, incidindo en que a prevención, a educación e o acompañamento das vítimas son ferramentas esenciais para avanzar cara a unha sociedade libre de violencia.