Arteixo aumenta un 10% o orzamento do novo Balneario e elévao a 3,2 millóns de euros
O Concello de Arteixo aprobará un incremento do 10% no orzamento destinado á rehabilitación do edificio do Balneario, unha modificación que supón sumar 380.000 euros e situar o investimento total en 3,2 millóns de euros. A decisión chega despois de que a dirección técnica detectase problemas e necesidades sobrevidas unha vez iniciadas as demolicións, que obrigaron a axustar o proxecto para garantir a seguridade e a calidade da intervención.
Entre as actuacións engadidas figura a retirada de amianto localizado na cuberta, así como traballos complementarios asociados á propia estrutura e á substitución de elementos do teito. Ademais, o plan inclúe a instalación de novos sistemas de desinfección para as augas dos mananciais, tras aparecer indicios que aconsellan reforzar este apartado no futuro funcionamento do complexo.
Malia o sobrecusto, o goberno local sostén que o calendario non se move e mantén a previsión de finalización para maio de 2026. O proxecto da última fase contempla destinar a primeira planta a ludoteca e espazos Concilia para nenos, nenas e maiores, mentres que na segunda planta se habilitará un espazo maker con recursos audiovisuais, sala polivalente e aulas de estudo.
Con esta intervención, o Concello busca completar a recuperación dun inmoble histórico que, unha vez rematado o conxunto de fases, roldará os 4.000 metros cadrados de instalacións públicas ao servizo da veciñanza. Parte das actuacións encádranse en liñas de financiamento vinculadas ao Plan de Recuperación (NextGenerationEU).