Arteixo aproba investimentos para sendas peonís con carril-bici en Sabón e humanización da travesía
O pleno do Concello de Arteixo iniciou a sesión cun emotivo minuto de silencio en lembranza da traballadora do servizo de axuda a domicilio de Porriño, recentemente asasinada.
Entre os asuntos aprobados, destaca a desestimación do recurso presentado pola empresa Aralia, encargada do servizo de axuda a domicilio na zona sur do municipio. O Concello sancionou con 18.000 euros a compañía por non implementar ao inicio do contrato unha aplicación informática que facilita o acceso aos datos do servizo e por retrasos na mellora das condicións materiais das traballadoras, como o mobiliario de oficina e o vehículo de empresa. Segundo informou o Goberno local, aínda que a sanción está en vigor, a empresa xa solucionou os incumprimentos.
Paralelamente, diante do Concello tivo lugar unha manifestación convocada por varias organizacións sindicais en apoio ás traballadoras do servizo, na que tamén se gardou un minuto de silencio polo recente falecemento da traballadora de Porriño, ao que asistiron todos os concelleiros da corporación.
En materia económica, o Goberno municipal aprobou un modificado de crédito que permitirá financiar diversas actuacións, entre as que destacan a construción de dúas novas sendas peonís con carril-bici no polígono de Sabón. Unha delas seguirá a avenida da Praia cun orzamento de 1,1 millóns de euros e a outra a avenida do Embalse, cun investimento previsto de 670.000 euros. Estes camiños contarán con tramos naturais entre árbores preto do embalse do Rexedoiro, habilitados como zonas de lecer, e se cubrirán as cunetas actuais para garantir a seguridade dos usuarios, coa instalación de sumidoiros e a canalización das augas pluviais.
Estas iniciativas buscan humanizar máis o espazo urbano e fomentar a mobilidade peonil e ciclista, sen reducir as prazas de aparcadoiro existentes. De feito, prevese aumentar o número de prazas na zona máis próxima á praia, mellorando tamén o acceso peonil e a plataforma para vehículos na entrada á área marítima.
O modificado tamén reforzará partidas para obras xa programadas, como a primeira fase da humanización da travesía de Arteixo, que abarcará 1,8 quilómetros dos 3,3 totais, cun investimento de 3,9 millóns de euros. Ademais, inclúe a fase final do complexo Balneario, que suporá a reforma da primeira e segunda planta do edificio principal (1,9 millóns) e a reforma da Casa de Baños (2,9 millóns). Outros investimentos previstos son a mellora do servizo de recollida porta a porta de papel, cartón e vidro en comercios e hostalaría, así como a elaboración da cartografía para o novo plan urbanístico, cunha achega de 100.000 euros para cada servizo.