Arteixo acolle formación en intelixencia artificial e competencias dixitais para o sector turístico
O concello de Arteixo pon en marcha, no marco do Plan de Sostibilidade Turística da Reserva de Biosfera Mariñas Coruñesas, un novo proceso formativo dirixido a reforzar as capacidades dixitais dos profesionais do sector turístico do municipio. A iniciativa busca mellorar a calidade, a competitividade e a innovación do destino mediante a incorporación responsable da intelixencia artificial e outras competencias dixitais no día a día de empresas e administracións.
A formación está pensada para un amplo abanico de destinatarios: hostalaría, aloxamentos, axencias de viaxes, guías oficiais, empresas náuticas, proxectos de interpretación do patrimonio, actividades turísticas e iniciativas agroalimentarias, así como técnicos municipais implicados na xestión turística. O programa ofrecerá ferramentas prácticas —desde dixitalización de servizos e xeración de contidos ata uso de datos e automatización de tarefas— adaptadas ás necesidades reais do tecido empresarial local.
O Concello anima ás empresas e profesionais de Arteixo a inscribirse e aproveitar esta oportunidade para conectar mellor coas demandas dos viaxeiros e avanzar cara a un modelo máis sostible e competitivo. A proposta non só atende á transformación tecnolóxica, senón que busca facelo respectando os valores naturais e culturais da Reserva de Biosfera, impulsando proxectos dixitais que favorezan tanto a experiencia do visitante como a conservación do territorio.