Arteixo acende o Nadal o 5 de decembro coa chegada de 'Papá Noel'
Arteixo xa ten data para prender a iluminación do Nadal. Será o venres 5 de decembro na praza do Balneario, onde o Concello organizará unha tarde chea de actividades pensadas para gozar en familia e dar a benvida oficial ás festas.
O programa arrancará ás 18.30 horas coa chegada de 'Papá Noel' a Arteixo, que fará a súa entrada na praza acompañado pola actuación da escola de baile 'Tempo 154'. Os e as bailarinas serán as encargadas de poñer a música e o ritmo aos primeiros momentos dunha xornada que aspira a encher o centro da vila de ambiente festivo.
Ás 19.00 horas terá lugar o acto central: o acendido das luces de Nadal, que estará a cargo dos membros do Club Salvamento Arteixo (SALV-AR) e do Club Natación Arteixo. As dúas entidades deportivas exercerán como mestres de cerimonias dun momento simbólico no que se iluminarán rúas e espazos públicos do municipio.
Durante o acto está prevista tamén a entrega da chave do Nadal por parte do alcalde, Carlos Calvelo, a 'Papá Noel', xesto co que se dará por inaugurado o Mercado do Nadal de Arteixo. A programación continuará na propia praza do Balneario cunha nova intervención da escola de baile 'Tempo 154', que porá o peche artístico á celebración.
Como colofón, as persoas asistentes poderán degustar chocolate quente con churros, nunha proposta coa que o Concello de Arteixo busca fomentar a convivencia veciñal e convidar a toda a cidadanía a mergullarse, desde o primeiro momento, no espírito destas datas.