'Arte por Palestina' enche o Liceo de Betanzos de denuncia e solidariedade
A sala Jesús Núñez do Edificio Liceo acolle desde hoxe a mostra colectiva 'Arte por Palestina', unha proposta impulsada polo colectivo Comarca de Betanzos con Palestina que quere abrir un espazo de reflexión e denuncia arredor da situación no país árabe. A exposición inaugúrase este mércores ás 19.00 horas cun acto que contará coa intervención de Amir Ismail Hejazy, médico palestino nacido en Gaza e residente en Ferrol, e coa actuación musical de Silvia Penide. A mostra poderá visitarse ata o 4 de decembro, en horario de 18.00 a 22.00 horas.
Desde o colectivo organizador explican que o obxectivo principal é non ceder ao silencio e manter viva a conversa pública sobre unha tregua que, ao seu xuízo, non chegou a ser real. A exposición quere sinalar tamén a impunidade coa que, consideran, se está a actuar e reivindicar o papel das artistas como voces que transforman en imaxe, cor e palabra aquilo que a sociedade pensa e sente. 'O arte permítenos facer visible o que ás veces non se quere mirar e poñerlle cara ao que está a acontecer en Palestina', apuntan desde o colectivo.
Na sala reúnense obras de creadoras e creadores da contorna de Betanzos, algunhas delas con traxectoria e proxección internacional. A mostra estrutúrase en dúas partes: por un lado, pezas cedidas expresamente para esta iniciativa e, por outro, unha selección de pancartas do colectivo Pancartitas, nacido en Santiago, que xa estiveron nas rúas nas mobilizacións de novembro de 2023. Xunto a elas exhibiranse novos traballos elaborados o pasado domingo 23 por artistas que colaboran co colectivo betanceiro.
En canto ás disciplinas, a proposta é maioritariamente pictórica, con cadros e carteis de forte carga simbólica e política. Tamén se inclúen algunhas láminas e unha intervención específica do artista da bisbarra Xoan Casal, que presenta unha instalación creada para este contexto, ademais dun mosaico que dialoga co resto das obras. O resultado é un percorrido visual directo, pensado para interpelar ás persoas visitantes máis alá da contemplación estética.
O médico palestino Amir Ismail Hejazy será o encargado de contextualizar a mostra na xornada inaugural, ofrecendo unha intervención na que actualizará a información sobre a situación en Gaza e no conxunto de Palestina desde a perspectiva das familias que seguen alí. A organización prevé que, tras a súa intervención, haxa un tempo aberto ás preguntas e ao diálogo co público asistente, nun intento de aproximar a realidade do conflito ás inquedanzas da veciñanza de Betanzos.
Ademais das obras, a exposición complétase con textos que recollen testemuños reais destes últimos meses, co fin de sumar palabras ás imaxes e reforzar a mensaxe. Desde Comarca de Betanzos con Palestina recoñecen que non é unha exposición cómoda de organizar pola dureza da temática, mais consideran imprescindible lembrar que Palestina continúa presente e que, como sociedade, aínda existe unha débeda pendente. A través dos carteis, das historias e das cores, preténdese que quen visite 'Arte por Palestina' saia coa conciencia máis alerta e coa vontade de non esquecer unha realidade que se prolonga no tempo.